بعد أيام من واقعة #متحرش_المعادي كارثة جديدة في #المعادي| مدرب ملاكمة بلطجي يعتدي على 3 طالبات وأمهم ومدرسة المعادي الثانوية بنات
قالولنا زمان الراجل اللي يمد ايده على بنت ميبقاش راجل ، ولا شم ريحة الرجولة وياخد بالجزمة على دماغه ،امال اللى يمد ايدة على مدرسة بنات كاملة ويسبب لبنت منهم عاهة مستديمة توصل لفقدان عين من عيونها دة يتعمل فيه ايه ؟؟؟؟!!!!!!!!
لما اب وام يخلفوا 3 بنات زي الورد الدنيا كلها بتحلف وتتحاكى في ادبهم واخلاقهم وحسن سلوكهم ومركز العلمى والاجتماعى ويشوفوهم وهما بيتضربوا من (ذكر) - عبارة عن بنى ادم 4 ادوار فوق بعض المفروض يعملوا ايييييه ؟؟!!!!!!!
دة اللي حصل في المعادي من يومين بالظبط ، المعادي اللي بقت بؤرة المصايب والسرقة والتحرش والقتل واخيرا ،، التعدي علي بناات امام مدرسة طلبة ثانوي ...
يوم الخميس 11/3 في مدرسة "الشهيد على احمد شوقي " المعادي الثانوية بنات سابقا" بعد الإمتحان قامت مجزرة بكل ما تحمله الكلمة في المدرسة ، واللي قام فيه شاب عنده 26سنة مدرب بوكس في چيم بالتعدي على بنات امام المدرسة بالضرب ، مستوعبين يعني ايه بناااااااااااات يتعدي عليهم واحد بالضرب !!!!!!!
طفلة يكون في بينها وبين زميلتها في المدرسة مشاجرة بنات عادية فالبنت تستعين ب bodyguard يضربها ويدمر مستقبلها وعلشان يلحقوها اخواتها البناات وامهم يتضربوا ويتسحلوا في الشارع جوة وبرة المدرسة جوووووووة وبرة المدرسة عيني عينك وفي عز الظهر !!!!! عشان مفيش امن ومفيش شرطة ومفيش اي حاااااااجة توقف المهزلة دي !
- ودة اللي حصل على لسان البنت الطالبة في المدرسة:
"كان في مشكلة قديمة بينا وخناقة بنات عادية وكانت بسنت هي واصحابها عاملين عصابة عليا، وفي نص اليوم، يوم الخميس جت البنت هددتني قبل ما نخلص الامتحان وقالتلي إستني مني مفاجأة تحت المدرسة، روحت كلمت أختى الكبيرة وقولتلها تيجي تاخدني عشان خايفة يحصل حاجة تاني وانا لوحدى ودة لان من شهر ام البنت دي جت قصاد المدرسة وانا مروحة نزلت من عربية شدتني من شعري وجريت بيا والعربية ماشية وكانت هتموتني .
- اختى الكبيرة كانت رايحة شغلها فقالتلى ماتخافيش مفيش حاجة هاجي اروحك وارجع شغلى ع طول ، وصلت برة المدرسة واتصدمت لما لقت بسنت(البنت البلطجية) جايبة شحط كبير مدرب بوكس (وإسمه علي محمد عيطه سيد ) ، وجايبة مامتها تاني وبنات تانية كتير جداا وهى برة لوحدها وانا جوة !! اتصلت ببابا وماما يجولنا المدرسة عشان مكناش عارفين هنمشي ازاى ..
واحنا خارجين من المدرسة البنت استفزت اختى الكبيرة وشتمتها وكانت هتمد ايدها عليها، ولسه هتدافع عن نفسها جه البلطجي اللى معاها ضرب أختي بالبوكسات ووقعها في الارض وفي اللحظة دي ماما وصلت هى واختى التانية اللي كانت راجعه من الامتحان زيي ولحقوا اختى منه .
فى نفس اللحظة مامت البنت إتلمت عليا هي وشوية البلطجية اللي معاها وفضل يجرجروني في الأرض عشان يدخلوني المدرسة بالعافية ويضربوني جوه، أختي الوسطانية فصلت تدافع وتحوش عني مسكوها وحبسوها جوه المدرسة وفضلوا حبسينها ويضربوا فيها جوه، والبلطجي دة بعد ما ساب اختى الكبيرة وماما برة نط من فوق سور المدرسة هو وصحابه، ضربوا كذا بنت جوه المدرسة، وكان معاه شومه ضرب أختي اللي حابسينها جوه في عنيها وجنبها وضهرها بالشومه ونزل عليها بالبوكسات مرحمهاش لدرجة ان في مدرس كان واقف حاول يحميها وخد كل الضرب مكانها لما شافها كانت خلاص بتموت من الضرب - (ودى كانت شهادة المدرس فى المحضر بالكلام ده).
مفيش حد من المدرسة كان قادر عليه في وسط المدرسة وقدام 100 بني ادم واقفين ومن قلة حيلة الناس ولد ف الشارع بقا يجيب طوب ويحدف عليه وواحد تاني يدي لماما اي حاجة تضربه بيها ومفيش فايدة .
وصلت الشرطة بعد نص ساعة من الاتصال وبعد ما كل حاجة كانت خلصت والبلطجي جرى وهرب بس جريوا وراه وجابوه ، وقتها بابا كان لسه واصل وكان فى حالة ذهول من منظر اختى ودخل معانا القسم ، حاولنا نخليهم يدونا تصريح نودي نهى (الاخت اللي اتصابت) المستشفى عشان نلحق عينها لكن بدون جدوى ، وفضلنا محجوزين ٧ ساعات و مش فاهمين اللي بيحصل ولا عارفين نكلم حد لان خدوا موبايلاتنا كلنا .
نتيجة كل دة ان البنت دلوقتي عندها مشكلة في القرنية وهي أصلا كانت عاملة عملية في عينها من شهرين، وكسر تحت العين واسفل الحاجب وحصلها شرخ في الحوض مكان الضرب بالشومه، وللاسف موضوع عنيها زاد أكتر لإنهم راحوا القسم وفضلوا 7 ساعات قاعدين بكل الجحود اللي في الدنيا من قسم شرطة المعادي مستنيين وكيل النيابة لما يوصل
و فين وفين على ما وافقوا يودوا نهى المستشفى 💔
كل ده حصل والبلطجي وأهل البنت البلطجية اللي جم عملوا مجزرة في المدرسة واتسببوا لبنت عاهة مستديمة بايتين في بيتهم عادي أهل البنت كلهم بقالهم يومين في المستشفى بيلفوا حوالين نفسهم عشان بنتهم اللي إتعملها عاهة مستديمة عشان احنا دولة القانون !! القانون اللي خرجه من الحبس عشان الموضوع يتلم ، وبناء على تهديد بعض الظباط في القسم و اللي فضلوا يضغطوا عليهم عشان يعملوا تنازل ويلموا الموضوع نظرا لان دي مكانتش اول حادثة تحصل في المعادي في الفترة دي ، وعشان يغطوا علي تقصيرهم من اللي حصل وعدم وجود امن كافى يحمي الناس .
السؤال دلوقتي حق البنات دى فين؟ وحق البنت اللي ضاع مستقبلها وعاشت يوم مرعب فين ؟ حقهم من البلطجية اللي استحلوا المدرسة مكان لبلطجتهم على خلق الله فين ؟؟؟
شيروا البوست على أد ماتقدروا عشان نجيب حق البنت اللي إتشوهت، واللي بيهددوا أهلها عشان تتنازل عن المحضر ويهربوا وده الحل الوحيد عشان نخلي القضية تمشي أسرع..
دي بعض الفيديوهات والصور المتصورة للي حصل وتقارير الحالة اللي اتصابت ، في فيديوهات وتقارير كتير في النياية للي حصل كله
ملحوظة : اهل البنت رافضين ينزلولها اي صور عشان حالتها النفسية، والبنت لحد دلوقتي محجوزة في المستشفى ادعولها.
حسبي الله ونعم الوكيل، ربنا المنتقم، وربنا اللي هيظهر الحق مهما كان الفساد 💔
#حق_البنت_مش_هيضيع
#بلطجي_مدرسة_المعادي
#حق_نهى_لازم_يرجع
#
#حادثة_المعادي